POLIISI y’e Matugga mu ggombolola y’e Gombe mu Nansana Munisipaali ekutte n’eggalira abavubuka bataano abasangiddwa n’ebyuma bye babadde basumuludde ku kikondo ky’amasannyalaze.
Kigambibwa nti we babakwatidde babadde babitwala kubisaanuusa era nga bagguddwaako gwa butujju
Abakwatiddwa kuliko: Brian Muyinda 22, Charles Musobozi 18, Bashir Kajjo 21, Christopher Ayesiga 20, ne Steven Sseninde 27 ng’ono yabadde ddereeva wa mmotoka nnamba UBA 859L, ebyuma bino kwe bibadde bitambuzibwa.
Okubakwata kiddiridde abakulembeze b’e kyalo ky’e Kasalirwe mu ggombolola y’e Gombe nga bakulembeddwaamu ssentebe w’ekitundu kino, Luzze Experito okusanga ng’ebyuma bisumuluddwa .
Bano bategeezezza poliisi era n’etandika okubalondoola okutuusa bwe babakutte mu nkuba enkedde okutonya nga babitwala kubisaanusa.
Kitegeekese nti ababadde ku mmotoka ne badduse kwe kukwata ddereeva naabo ababadde bazze okubitikkula nga babasanze ku kikomera okumpi ne kkampuni esaanuusa ebyuma.
Amyuka Omwogezi wa poliisi mu Kampala n’emirirano, Luke Oyowesigyire agambye nti abakwate bagguddwaako omusango gw’obutujju era bakuumibwa ku poliisi y’e Matugga ng’okunoonyerezza bwe kugenda mu maaso.
