Wabaddewo obunkenke n’akasattiro ku kanisa y’omusumba Robert Kayanja eya Lubaga Miracle center mu Lubaga, wakati ng’abakkiriza bali mu kusaba, ab’eby’okwerinda bwebazinzeeko ekifo kino, okukwata agambibwa okuba omutujju abadde ateekateeka okukuba bbomu mu kifo kino.
Kigambibwa nti omutujju azze n’ekintu ekyefananyiriza fulasika etereka emmere, wabula nga watuukidde ku kanisa eno ebitongole ebikesi bibadde bimulondoola.
Okusinziira ku beebyokwerinda bbomu eno ebadde nkolerere nga bajijingiridde mu misumaali, bbaatule za pikipiki, charger n’essimu.
Omwogezi wa police mu Kampala neemiriraano, Patrick Onyango, akakasizza nti omutujju ono, akwatidwa era ne bbomu ab’ebyolwerinda bajitulisizza nebajisanyaawi.
Onyango agambye nti omutujju ategerekese nti ye, Kintu Ibrahim ow’emyaka 28, kyokka nti abategeezezza nti wakyaliyo banne abalala 3, abateeberezebwa okuba mu mupango guno gwegumu, era nti nabo balagiddwa okubaako bbomu endala zebatega.
Onyango agamba nti wakyaliwo ne bbomu endala 3 ezikyayiggibwa nga ziri mu bitundu ebyenjawulo, n’alabula abantu abakungaanira mu bifo by’olukale ebirimu abantu abangi okubeera abegendereza.
Omusumba Kayanja, ategezezza endiga ezibadde mu kkanisa nti basanidde okwebaza ennyo Katonda abakuumye obutattibwa bbomu nti kuba ye ajrabyeko n’amaaso ge.
Kayanja agambye nti embeera bagikutte mu kimpowooze okwewala abantu okubuna emiwabo, ekibadde kiyinza okuvaamu ebizibu ebirala.
Bino bijjidde mkiseera nga waliwo obubaka bungi obuzze bulabula, Uganda nti enaatera okutuusibwako obulabe okuva mu bakyamu.
Obulumbaganyi obwenjawulo obuzze butuusibwa ku Uganda, kigambibwa nti bubadde bukolebwa batujju aba ADF, akabinja akaabayeekera akasinziirira mu bitundu bye DRC e Congo.
Obulumbaganyi obukyasembyeyo okukolebwa ku Uganda, bwaliwo mu mwaka gwa 2021 bwebaakuba bbomu 2 mu Kampala ku CPS ne ku kizimbe kya Jubilee Insurance ku Parliamentary Avenue omwafiira abantu abawera omwali naabasirikale ba police.
